بلاگ

جو کٹک لو او منتظر

نیویشاک: احمد فراز

یورو شاخور زومان پھورین توری زمینو ویشکی راہی۔ چھوچو شارو گان بوئیکران ہوازو سوم جوست۔۔ ہار کا تن کورمو عمالہ۔۔۔ لوٹھوران بیلو کھوٹوا دیتی نعمتن اوغ کوریکوت وا چیچق تان سکولن ویشکی۔ قاسم پورا چھوئے اوریکو نو بیتی والاغبیلو روپھی ہے منظرن لاڑیران۔ قاسم نیوفو (9) امتحانہ جو کتابن بہچے سخت پریشان اسور۔ نہ اورارو گوین نہ سکون۔ والغبیلو قاسم او پوشی نان حیران بیتی ہوئی دوین۔
نن: کیاغ چھامیتانی تھے نو تن نانو بلبل ؟ ژوت روپھیتاو وا !
قاسم: ای دربت پھیک بیتی گویا کیا سوچا بوخدو غون ۔ "نولا”
نان: یی گے ناشتہ کو۔
قاسم: جام
دوری اوتیکو سوم تان تت چت غیچھان آہی کوری لاڑیران وا کیا لو دی نو۔
ناشتہ کوری پھوک مودا اچہ حبیب (قاسم او لوٹ برار) گوین۔
حبیب : سبق نو ریکو ہش بوئے۔ آہی بوغاک او سوم آہی اف بوغک اوسوم اف بو۔ اوا حیران ہے پھاتی کتابن دی کیچہ پازیتاو ! ۔۔۔
نن ٹیکھار یو کوری حبیب اوت تھون بیتی۔۔۔
نن : بس لا ژاو کیا تو کیا تت مہ ژاو سکونو اواتامی۔ مہ ژاو او زندگی بار گیاک سالوت پازیر۔
قاسم غیچی اشرو کوری اف نیسیرن۔
خالد قاسم او چیقیو ملگیری وا کندوری لو کی ہونی ہیت تان موژی نو کھوشتینی۔ قاسم خالد اوت میسیچ کوین۔ اندازو پوشی تان خالد ہوش کوین کی قاسم پریشان اسور رے۔
خالد: اوا تت لو دیتی اسوم پریشان نو بوس۔ جو کتاب تت کیا بونیین۔ گیاک سالوت زیادہ نمبر گانیس۔ ہش نو بوس ۔ خوشان ہل بوس۔
قاسم: ہمی لووان تسار علاوہ کا نو دونیین۔ تت دی خفا مسار، برار گینی بار بار قہری بونیین۔ دیہو روئے سف بشار کونین۔
خالد: ہے لووان موژی مو دیت۔
قاسم : نو بوین لا۔ ہیت بو اثر کونیین۔ زندگی مشکل بی شر۔ مسوم کا جو کٹک دلاسو لو دیاک نکی۔ جو اپک لو کاکی مسوم دونی ہمت بوئے مہ موژا۔ مستقبل اوت تیار بوم۔
قاسم کیڑی موبائل او بند کوین ۔
وخت پھائے بوغاو گوین مگم قاسم انوسار انوست پریشان باو گوین۔ اف نیسیکو رویتو دیرو بشار کونین۔ دوری گیگو دورو روئے خفا۔ قاسم صرف ہتے ‘جو کٹک لووان منتظر’ کی کا تو دلاسہ دیتی تو کھپالو اف ماژی ہمونی ریلیک کی۔۔۔ پریشان نو بوس۔ نمبر تہ زندگی او سار قیمت نو۔
ہمی لو قاسم او ذہنہ ہانی قائی بونیین کی ہیس غیژی ہل بیک شروع کوین۔
ای انوس چھوچہ بو ملال بوین۔ قاسم ناشتوت نو گوین۔ نن پریشان بیتی قاسم او دوواختہ بی۔۔۔
نن: قاسم۔۔۔ آہی روپھے گور ہوئے۔ کیاغ چھامیتانی تھے نو!
کمرار کیا ہواز نو گوین۔ نن ہوئی دیتی بیران۔
قاسم او کیا پتہ نو بوین!
ای خور دفعہ نن دوواختہ گوین۔
نن: قاسم۔۔۔۔ قاسم ۔۔۔۔۔
ہواز نو گوین! نن او ہردی شانیران
دوڑ ہوئی دوین۔۔۔ قااااسم۔۔۔۔۔ !
نن پریشان بیتی حبیب او مشکیران۔۔۔ حبیب ہوئی دوین۔ کیا جواب نو گوین !
حبیب ناخڑی او چھینیران۔۔۔
اندرینی بی لاڑیران کی پورا کمرہ لییا مڑاغ بی شر! قاسم تن سورو ماری اسور! قاسم خودکشی کوری اسور ! نن چیغ نے بے ہوش بوین !
ای کما وخت اچا حبیب
فیسبک آ نیویشیران۔۔۔ ہائے قاسم۔ افسوس! "جو کٹک لو تسوم دیرووا ہموش نو بیسیر”

Back to top button